Divisional Secretariat - Delft

பொதுமக்களுக்கு நேர்மையான, வெளிப்படையான மற்றும் பொறுப்பான அரச சேவையை வழங்கும் நோக்கில், நெடுந்தீவு பிரதேச செயலகத்தில் உள்ளக அலுவல்கள் பிரிவு (Internal Affairs Unit – IAU) முறைப்பாட்டு பொறிமுறை செயற்பாட்டிலுள்ளது. அரச சேவையில் இடம்பெறும் முறைகேடுகள் தொடர்பான தகவல்கள்,ஊழல் அல்லது இலஞ்சம் தொடர்பான முறைப்பாடுகள் அலுவலக நடைமுறைகளில் காணப்படும் முறைகேடுகள்,பொதுமக்களுக்கு வழங்கப்படும் சேவையில் தாமதமான செயற்பாடுகள்,அதிகார துஷ்பிரயோகம் அல்லது ஒழுக்கமற்ற செயற்பாடுகள் மற்றும் வேறு ஏதேனும் முறைகேடான செயற்பாடுகள் தொடர்பாக உங்களிடம் முறைப்பாடுகள் இருந்தால் அவற்றை பிரதேச செயலக உள்ளக அலுவல்கள் பிரிவிற்கு பின்வரும் முறைகளில் அறியத்தரலாம்

📞 தொலைபேசி: 0212215202

📱 WhatsApp: 0766088333

📧 மின்னஞ்சல்: iau.divsdelft@ gmail.com

🌏முகவரி: உள்ளக அலுவல்கள் பிரிவு, பிரதேச செயலகம்,நெடுந்தீவு.

👉 QR Code இனைப் பயன்படுத்தி முறைப்பாடுகளை சமர்ப்பிக்கமுடியும்.

உங்கள் குரல் மாற்றத்தை உருவாக்கும்! உங்கள் பங்களிப்பு நேர்மையான நிர்வாகத்தை வலுப்படுத்தும்! 🇱🇰ஒரு சிறந்த அரச சேவையை உருவாக்குவதில் பொதுமக்களின் விழிப்புணர்வும் ஒத்துழைப்பும் அவசியமானது. உள்ளக அலுவல்கள் பிரிவு (IAU), பிரதேச செயலகம் - நெடுந்தீவு

<

முன்பள்ளிச் சிறார்களுக்கான காலையுணவுத் திட்டத்தினை கண்காணித்தல் நெடுந்தீவு பிரதேச முன்பள்ளிச் சிறார்களுக்கான காலையுணவு வழங்கும் திட்டத்தின் செயற்பாடுகளை உதவிப் பிரதேச செயலாளர் அவர்கள் இன்றைய தினம் (2026.10.14) நேரில் சென்று பார்வையிட்டார். முன்பள்ளிச் சிறார்களின் ஆரோக்கியம் மற்றும் போசாக்கு நிலையை மேம்படுத்தும் நோக்கில் முன்னெடுக்கப்படும் இத்திட்டத்தின் கீழ் சிறார்களுக்கு வழங்கப்படும் காலையுணவின் தரம் மற்றும் திட்டத்தின் செயற்பாடுகள் தொடர்பில் இதன்போது அவதானிக்கப்பட்டன. சிறார்களுக்கு முறையானதும் போசாக்கு நிறைந்ததுமான காலையுணவு கிடைப்பதை உறுதிப்படுத்தும் நோக்கில் இக் களத்தரிசிப்பு இடம்பெற்றது. சிறார்களின் ஆரோக்கியமான வளர்ச்சி, உடல் மற்றும் உளநல மேம்பாடு, அத்துடன் சிறந்த கல்வி அடைவுகளைப் பெற்றுக்கொள்வதற்கும் இவ்வாறான போசாக்குத் திட்டங்கள் முக்கிய பங்காற்றுகின்றன.

<

நெடுந்தீவு பிரதேச செயலகத்தின் 2026 ஆம் ஆண்டிற்கான மூன்றாம் காலாண்டு கணக்காய்வு முகாமைத்துவக் குழுக் கூட்டம் நெடுந்தீவு பிரதேச செயலகத்தின் 2026 ஆம் ஆண்டிற்கான மூன்றாம் காலாண்டு கணக்காய்வு முகாமைத்துவக் குழுக் கூட்டம் இன்று (2026.10.15) காலை 10.00 மணிக்கு மதிப்பிற்குரிய பிரதேச செயலாளர் திரு. நடராசா பிரபாகரன் அவர்களின் தலைமையில் பிரதேச செயலக மாநாட்டு மண்டபத்தில் நடைபெற்றது. இதன்போது வருடத்தின் இதுவரை காலம் வரையான நிதி முன்னேற்றங்கள், கணக்காய்வு விடயங்கள் மீதான முன்னேற்றங்கள் மற்றும் எதிர்வரும் காலத்திற்கான திட்டமிடல் முன்னளிப்புகள் என்பன பிரதேச செயலக கணக்காளர் திரு. க.சிறிதரன் அவர்களால் சமர்ப்பிக்கப்பட்டு விளக்கமளிக்கப்பட்டன. இந்நிகழ்வில், நெடுந்தீவு பிரதேச செயலகத்தின் பதவிநிலை உத்தியோகத்தர்கள் மற்றும் குறித்த விடயங்களுடன் தொடர்புடைய ஏனைய உத்தியோகத்தர்கள் கலந்துகொண்டனர்.

<

சுற்றுலா சேவை வழிகாட்டி (Site Guide) பயிற்சி நெறி - முதலாம் நாள் ​வடமாகாண சுற்றுலாப் பணியகத்தின் ஏற்பாட்டின் கீழ் வடபகுதியில் சுற்றுலாத்துறையை மேம்படுத்தும் நோக்கில் 07 நாள் சிறப்புப் பயிற்சிநெறி (Site Guide Training) இன்றைய தினம்(2026.10.14) உதவிப் பிரதேச செயலாளர் தலைமையில் ஆரம்பித்துவைக்கப்பட்டது. ​இந்நிகழ்வின் ஆரம்ப நாள் நிகழ்வுகள் மற்றும் பயிற்சி வகுப்புகள் வெற்றிகரமாகத் தொடங்கி இடம்பெற்று வருவதோடு இப்பயிற்சி நெறியானது சுற்றுலாத்துறையில் ஈடுபட விரும்பும் மற்றும் சேவை வழங்கும் நபர்களுக்கு துறைசார்ந்த வளவாளர்களால் மிகச்சிறந்த வழிகாட்டலையும் பயிற்சியையும் வழங்கும் வகையில் ஏற்பாடுசெய்யப்பட்டுள்ளது.

<